Блискиот Исток денеска беше потресен од сериозна безбедносна ескалација откако Иран изведе масовен ракетен и беспилотен напад врз повеќе градови во Заливот. Цели беа урбани и стратешки точки во Доха, Кувајт, Дубаи, Абу Даби и Манама, каде што жителите сведочеа за низа експлозии и активирање на системите за воздушна одбрана.
Во неколку метрополи речиси истовремено одекнаа силни детонации. Очевидци во Дубаи пријавија две експлозии во краток временски интервал, по што борбени авиони прелетувале над градот. Во Доха, според локални извори, се слушале интензивни истрели и пресретнувања, додека во Абу Даби одекнала силна експлозија што ја вознемири јавноста.
Кувајтските власти соопштија дека противвоздушната одбрана успешно пресретнала повеќе цели над крајбрежниот појас. Сирените повторно се огласиле во главниот град, а непотврдени информации говореа за чад во близина на американската амбасада. Бригадниот генерал Мохамед Ал-Мансури од Кувајтската цивилна одбрана изјави дека нападите биле неутрализирани во северниот дел од земјата, во близина на Салва и Румаитија, и дека нема цивилни жртви. Министерството за одбрана дополнително увери дека „голем број непријателски воздушни цели“ биле ефикасно пресретнати.
Во Бахреин, ситуацијата доби трагичен епилог. Министерството за внатрешни работи извести дека фрагменти од пресретната ракета предизвикале пожар на брод што бил на сервис во индустрискиот град Салман. Во инцидентот загинал еден работник од азиско потекло, а уште двајца се здобиле со тешки повреди. Одбранбените сили на земјата соопштија дека нивните ракетни системи реагирале навремено и дека сите единици остануваат во состојба на максимална подготвеност.
Меѓународната реакција следуваше брзо. Соединети Американски Држави, Саудиска Арабија и повеќе арапски држави ја осудија офанзивата, оценувајќи ја како опасна ескалација што ја нарушува регионалната стабилност и го доведува во ризик цивилното население. Во заедничката изјава се истакнува правото на погодените земји на самоодбрана и се поздравува координацијата во противвоздушната заштита, која, како што се наведува, спречила далеку потешки последици.
И претставниците на Советот за соработка во Заливот на итен видео состанок ги осудија нападите, оценувајќи ги како „дрски и неоправдани“. Тие нагласија дека ќе бидат преземени сите неопходни мерки за заштита на безбедноста, суверенитетот и стабилноста на земјите-членки.
