Емануел Макрон најави радикално засилување на нуклеарниот потенцијал на Франција, прво од неколку децении, со што земјата ја зацврстува својата улога како клучна одбранбена сила во Европа. Претседателот истакна дека Париз ќе ја прошири соработката во областа на нуклеарното оружје со осум европски сојузници, меѓу кои и Обединетото Кралство, Германија и Полска, како дел од новата стратегија за одвраќање.
Говорејќи од базата за нуклеарни подморници Ле Лонг во Бретан, Макрон посочи дека „геополитичката нестабилност, полна со ризици“, ја прави неопходна модернизацијата и проширувањето на францускиот нуклеарен арсенал. Тој најави дека земјата ќе распореди борбени авиони „Рафал“ способни за нуклеарни напади во партнерски земји, што значително ќе го прошири француското стратешко присуство низ Европа.
Сепак, конечната одлука за користење на нуклеарно оружје ќе остане исклучиво во рацете на францускиот претседател, а „дефиницијата на виталните интереси“ на Франција ќе биде суверена. „Нашите противници не смеат да посмелат да нападнат без сигурност дека ќе претрпат непоправлива штета“, нагласи Макрон.
Со проценети 290 нуклеарни боеви глави, број кој не се менува од 1992 година, Франција сега има четврти најголем нуклеарен арсенал во светот, по Русија, САД и Кина. Макрон додаде дека владата нема да објавува точен број на дополнителни боеви глави, наведувајќи дека проширувањето е неопходно за одржување на стратешката моќ, а не за трка во вооружување.
Заменик-директорот на францускиот think-tank FRS, Бруно Тертрe, оцени дека ова е „најзначајното ажурирање на француската нуклеарна доктрина во последните три децении“ и „огромен чекор напред“ во обезбедувањето на европската безбедност.
Извор: Дневник.хр
