Во знак на засилена поддршка кон Кипар, францускиот претседател Емануел Макрон денеска го информираше кипарскиот претседател Никос Христодулидис дека Париз ќе испрати на островот противракетни системи, анти-дрон технологии и фрегата, објави кипарската новинска агенција ЦНА, повикувајќи се на свои извори.
Помошта од Франција следува по два телефонски разговори помеѓу лидерите во понеделникот. Покрај тоа, Христодулидис побарал од германскиот канцелар Фридрих Мерц да испрати фрегата, а од Берлин веќе пристигна позитивен одговор, со очекување на официјална одлука наскоро.
И Атина се вклучи во поддршката кон Никозија. Министерот за национална одбрана на Грција, Никос Дендиас, потврди дека четири авиони Ф-16 веќе се на Кипар, додека две грчки фрегати се во пат кон островот. Портпаролот на кипарската влада, Константинос Летибиотис, објави и видео од авионите на Икс, истакнувајќи дека тие се дел од итната реакција на Атина за зајакнување на превентивните безбедносни мерки и блиската соработка меѓу двете земји.
За подобра координација на активностите, денеска на Кипар ќе престојува и грчкиот министер за одбрана, кој ќе оствари средба со својот кипарски колега, Василис Палмас.
Кипарските медиуми, пак, рано утрово известија за лажна тревога во областа Акротири, каде се наоѓаат британските воени бази. Иако првично беше испратена порака за итна евакуација, по само две минути следеше појаснување дека се работи за лажна тревога.
