Владата е подготвена да реагира со намалување на акцизите и дел од даноците на горивата доколку цената на нафтата нагло порасне на светските берзи. Премиерот Христијан Мицкоски изјави дека мерката се разгледува како начин за ублажување на ударот врз животниот стандард на граѓаните, посочувајќи дека ескалацијата на конфликтот на Блискиот Исток може да предизвика економски притисоци, особено во нафтениот сектор.
Мицкоски нагласи дека Македонија нема голема зависност од природниот гас, но растот на цените на нафтата може да се почувствува. Владата веќе води разговори со Министерството за финансии за можни мерки во случај на поскапување, а премиерот уверува дека безбедносната состојба во земјава е стабилна.
Економските експерти предупредуваат дека продолжувањето на конфликтот може да предизвика инфлациски бран и поскапување на енергенсите, со ефекти кои би се почувствувале веќе за две недели. Цената на нафтата „брент“ се искачи на околу 83 долари за барел, а нестабилноста околу Ормускиот теснец создава проблеми во снабдувањето. Дел од компаниите веќе ја избегнуваат оваа рута, што дополнително ја загрева глобалната економска ситуација.
Аналитичарите предупредуваат дека ако конфликтот продолжи, растот на цените на енергенсите ќе има директни последици и за македонската економија, како и за европските пазари.
