Еврозоната и Европската Унија ја почнуваат 2026 година со благо намалување на невработеноста, покажуваат најновите податоци на Евростат, статистичката служба на Европската Унија. Во јануари, стапката на невработеност во еврозоната изнесува 6,1%, што претставува намалување од 6,2% во декември 2025 година и од 6,3% во истиот месец лани.
Слична позитивна тенденција се забележува и во целата Европска Унија, каде што стапката паднала на 5,8% во јануари 2026 година, во споредба со 5,9% во декември и 6,0% пред една година. Според Евростат, тоа значи дека во ЕУ има околу 12,9 милиони невработени, од кои 10,77 милиони се во земјите членки на еврозоната. За само еден месец бројот на невработени се намалил за околу 185 илјади во ЕУ и за 184 илјади во еврозоната, а во однос на јануари 2025 година, намалувањето изнесува 274 илјади и 273 илјади лица, соодветно.
Младинската невработеност, која ја опфаќа групата под 25 години, останува повисока од просекот. Во јануари 2026 година, 15,1% од младите во ЕУ и 14,8% во еврозоната се без работа. Околу 2,92 милиони млади се невработени во ЕУ, од кои 2,35 милиони живеат во еврозоната. Во споредба со декември, бројот на младите без работа се намалил за 27 илјади лица во двете групи на земји.
Разликите меѓу половите остануваат видливи, но се намалуваат. Во ЕУ, невработеноста кај жените падна на 6,0 отсто, додека кај мажите изнесува 5,7 отсто. Во еврозоната, стапката кај жените е 6,3 отсто, а кај мажите 6,0 отсто.
