31 март 2026,, Скопје – Неизвесностите од глобалното окружување и нивното негативно влијание врз македонската економија, тековните економски показатели и можните мерки коишто во иднина ќе треба да се преземат од страна на Владата, а се во интерес на приватниот сектор и одржување на економската активности, беа теми на состанокот на министерката за финансии Гордана Димитриеска-Кочоска со претседателот на Стопанската комора Бранко Азески и членови на Управниот одбор на Стопанската комора на Северна Македонија
„Ова е време на неизвесност и во такви услови сите засегнати страни треба да се обединат и да дадат свој придонес во надминување на состојбата. Владата во изминатиот период даде сериозна поддршка преку обезбедување средства за инвестиции по поволни услови, како и преку транспаретната и успешна постапка за поврат на солидарниот данок кон компаниите. Оваа Влада останува посветена во поддршката на бизнис секторот“, рече министерката и додаде дека мора да разговараме отворено за сите предизвици за да можеме да си помогнеме.
На состанокот беше оценето дека Владата има конструктивен однос со бизнис секторот и дека мерките што досега се преземени во однос на актуелната криза се навремени и дека во наредниот период зависно од развојот на состојбата треба да се донесат таргетирани мерки.
„Соработката со Владата ни е на високо ниво. Изнесените ставови се заеднички проблеми на сите, а решение ќе изнајдеме ако сите партиципираме во нивното решавање. Стопанската комора ќе даде максимален придонес во надминување на состојбата и јавноста ќе ја увериме дека заеднички работиме во интерес на сите со цел да ја одржиме економијата и за да ги надминеме овие непредвидени ситуации“, рече Азески.
Како еден од најважните заклучоци на средбата беше дека Стопанската комора до Министерството за финансии ќе достави предлог сет на таргетирани мерки коиштопроизлегуваат од потребите на реалниот сектор, а ќе бидат исклучиво во насока на надминување на предизвиците од глобалните случувања.
…
