Министерката за енергетика, рударство и минерални суровини Сања Божиновска денес го отвори настанот „Женски лидерски дијалог во енергетиката“, посветен на улогата на жените во енергетскиот сектор и нивното поголемо вклучување во развојот на обновливите извори на енергија и енергетските заедници.
Во своето обраќање, министерката Божиновска истакна дека енергетската транзиција е процес кој директно ги засега луѓето, заедниците и економскиот развој, а улогата на жените во оваа трансформација е суштинска.
„Кога зборуваме за енергетската транзиција, не зборуваме само за технологии, мегавати и инвестиции. Зборуваме за луѓе, за заедници и за можности. А токму тука, улогата на жените е незаменлива“, истакна Божиновска.
Таа нагласи дека и покрај напредокот, жените и натаму се недоволно застапени во енергетскиот сектор, особено на технички и раководни позиции, и дека потребни се системски чекори за промена на оваа состојба.
„Ако сакаме повеќе жени во енергетиката, мораме да дејствуваме системски – да ги охрабруваме девојчињата да избираат технички и научни професии, да создадеме програми за менторство и професионален развој и да обезбедиме фер и транспарентни можности за напредување“, порача министерката.
На настанот беше претставен и регионалниот проект „Жените во енергијата – WIN“, чија цел е зајакнување на улогата на жените во енергетиката преку обуки, вмрежување и градење знаења за нови можности во секторот, вклучително и учество во енергетски заедници и развој на проекти во обновливите извори.
Министерката Божиновска во своето обраќање упати силна порака до младите жени да бидат храбри и да не се плашат да влезат во области кои традиционално се сметале за машки.
„Енергетиката има потреба од вашата креативност, вашата визија и вашата храброст. Вие сте идните инженерки, експертки, претприемачки и лидери. Вашето време започнува токму сега“, порача министерката.
Таа нагласи дека Министерството за енергетика, рударство и минерални суровини останува посветено на создавање услови за поголема инклузивност во секторот, со поддршка на иницијативи кои ги охрабруваат жените активно да учествуваат во енергетската транзиција и развојот на зелената економија.
../
