Министерството за дигитална трансформација е во завршна фаза на подготовките за усогласување на македонското законодавство со европските правила за „роаминг како дома“. Министерот за дигитална трансформација, Стефан Андоновски, денеска потврди дека Македонија има амбиција да стане првата земја од регионот која ќе ги исполни сите критериуми на Европската Унија за оваа мерка.
Андоновски објасни дека Европската комисија пред две недели го стартувала процесот за сите држави од Западен Балкан, вклучувајќи ја и Македонија, при што секоја земја мора индивидуално да ги исполни условите пред да започнат билатералните преговори. „Во овој период, ЕУ веќе ги доби измените и дополнувањата на Законот за електронски комуникации, со кои се усогласивме во делот на безбедноста, фер користење на роамингот, цените и прекуграничното нивно утврдување. Очекувам по добивањето на коментарите од ЕК, законот да биде испратен во Собранието и донесен, со што ќе бидеме први во регионот кои го исполнуваат условот за ‘роаминг како дома“. Потоа ќе започнеме преговори со ЕК како посредник пред европските телеком оператори и ќе склучиме договори“, рече министерот, нагласувајќи дека динамиката на процесот ќе зависи од ЕК, но Македонија е целосно подготвена за 2026 година.
Паралелно, Министерството отвора и прашање за појаснување на законската рамка за инфлуенсерите и креаторите на содржини. Андоновски информира дека вчера се одржа средба со претставници на Здружението на инфлуенсери, а наскоро е закажан и состанок со директорот на Агенцијата за аудио‑визуелни медиумски услуги (АААВМУ).
„Законот за АААВМУ не ја прави разликата помеѓу платформа и креатор на содржини. Не е дефинирано што е платформа како Инстаграм, Фејсбук или Јутјуб, а што е креатор кој ја користи платформата за сопствена содржина. Ќе разгледаме дали е потребно дополнително менување на правилникот или ќе мораме да изготвиме законска измена за да бидеме во согласност со европските стандарди, кои јасно ја прават оваа дистинкција“, појасни министерот.
