Полицијата го расчисти убиството што ја вознемири јавноста во Виница, а како главен осомничен е приведен 80-годишен државјанин на Грција.
Според информациите од МВР, на 28 март во 16:11 часот во близина на градските гробишта во Виница бил пронајден починат 56-годишен маж со иницијали (Д.А) од селото Липец. Лекар констатирал смрт, по што по наредба на јавен обвинител телото било предадено на обдукција.
Во рамки на истрагата, полицијата лишила од слобода повеќе лица – И.Л.(24), Г.П.(80), С.Р.(55) сите од Република Грција и С.З.(57) од селото Жабени, Битолско. Меѓу нив е и 80-годишниот Г.П., кој се сомничи дека е директно вмешан во убиството.
Извршени се претреси во возила и сместувачки објекти во Виница каде престојувале осомничените. При акцијата биле пронајдени и одземени четири ловни пушки, околу 800 парчиња муниција, како и други предмети од интерес за истрагата.
Против главниот осомничен ќе биде поднесена кривична пријава за убиство, додека за останатите лица се преземаат дополнителни мерки во координација со Основното јавно обвинителство Кочани.
Случајот предизвика силен интерес во јавноста, особено поради фактот што во настанот се вмешани странски државјани, а истрагата продолжува со цел целосно расветлување на мотивите и околностите.
