Уште една жртва на македонските патишта. Деветнаесетгодишна девојка од светиниколското село Црнилиште го загубила животот во сообраќајна несреќа што се случила доцна синоќа на локалниот пат меѓу селата Пиширово и Црнилиште.
Според информациите од Министерството за внатрешни работи, несреќата била пријавена околу 22:00 часот во ОВР Свети Николе. Девојката, Т.Д. (19), управувала патничко возило „Сеат“ со светиниколски регистарски ознаки, кога од засега непознати причини излетала од патот.
Од здобиените повреди, таа починала на местото на несреќата. Лекар од Итната медицинска помош констатирал смрт.
По наредба на јавен обвинител, телото на починатата е предадено за обдукција.
Увид на местото на несреќата извршила увидна екипа од ОВР Свети Николе. Причините и околностите под кои дошло до несреќата дополнително се утврдуваат.
…
