Претседателката на Косово, Вјоса Османи, денес ја потпиша одлуката за распуштање на парламентот, отворајќи пат кон вонредни парламентарни избори. Османи ја обвини Собранието за неможноста да избере претседател и оцени дека тоа ја турнало земјата во нова политичка криза.
„Ситуацијата можеше целосно да се избегне. Жал ми е што пратениците не го ставија интересот на народот на прво место“, истакна Османи на прес-конференцијата. Таа додаде дека денес ќе се сретне со лидерите на парламентарните партии за да се договори датумот за новите избори.
Косовскиот парламент, на вонредна седница што се одржа доцна во четврток, не успеа да го избере претседателот, прекинувајќи го изборниот процес поради недостиг на кворум. За да се избере претседател во првите два круга, потребни се 80 гласови, додека во третиот круг доволни се 61.
Владејачката коалиција имаше присутни 66 пратеници, додека опозицијата целосно ги игнорираше седницата.
Претходно беа предложени уставни амандмани за овозможување директно гласање за претседател, но и таа иницијатива пропадна поради недостиг на пратеничкиот минимум. По ова, претседателката на собранието Аљбулена Хаџију, најави дека ќе побара од Уставниот суд привремено да се стопира рокот за избор на претседател, за да се обезбеди време за политички договор и избегнување на уште поголема криза.
