Турција планира да распоредe четири борбени авиони Ф-16 на северот на Кипар со цел да ја обезбеди безбедноста на самопрогласената Турска Република Северен Кипар (ТРСК), во услови на растечки регионални тензии поврзани со конфликтите на Блискиот Исток.
Според извори на турското Министерство за одбрана, авиони Ф-16 ќе бидат стационирани на аеродромот Ериџан. Овој потег следи откако Грција веќе распореди четири авиони Ф-16 „Вајпер“ и фрегати „Кимон“ и „Псара“ во Пафос, по нападот со ирански дронови врз британската база Акротири минатата недела.
И покрај зголемените тензии, Анкара не поднела официјален протест за грчкото распоредување на сили, а се најавува и посета на делегација од грчките воздухопловни сили на Турција во рамки на мерките за градење доверба.
НАТО потврди дека иранската балистичка ракета која оваа недела беше соборена над Турција била насочена кон базата Инџирлик, а не кон Кипар, додека Техеран ги негираше обвинувањата за лансирање проектили кон турска територија.
Засилувањето на военото присуство на Кипар се случува во период на растечки безбедносни ризици во источниот Медитеран, каде повеќе земји ги зајакнуваат своите позиции поради ескалацијата на конфликтите на Блискиот Исток.
