Македонија би можела да биде домаќин на Детскиот Евросонг 2026, објави специјализираниот портал Eurofestival News. Доколку информацијата се потврди, ова ќе биде првпат евровизиски музички настан да се одржи во Македонија, што би претставувало историски момент за македонската музичка сцена.
Според објавата, до оваа одлука дошло откако Франција се повлекла од кандидатурата за организација на натпреварот. Генералниот директор на San Marino RTV, Роберто Серџо, изјавил дека по откажувањето на Франција, домаќинството му припаднало на Северна Македонија.
„Франција се откажа, а Северна Македонија беше пред нас во апликацијата, така што тие ќе бидат домаќини“, изјавил Серџо.
По оваа изјава, следувала кратка дискусија меѓу него и шефот на делегацијата Дени Монеци, при што Серџо рекол:
„Франција се откажа, па ќе одиме… Не се сеќавам каде. Во Црна Гора? Не, во Северна Македонија. Не требаше да го кажам, но веќе го кажав.“
Иако информацијата веќе предизвика големо внимание меѓу евровизиските фанови, официјална потврда сè уште се очекува од Европската радиодифузна унија и од Македонската радио-телевизија (МРТ).
Доколку ова навистина се случи, Македонија ќе стане првата земја од поранешна Југославија што ќе организира евровизиски настан по Евровизија 2008 во Белград, што би било значајно признание за македонската музичка и телевизиска продукција.
Организацијата на Детскиот Евросонг би значела и голема меѓународна промоција за земјата, со учество на десетици држави и милионска публика која традиционално го следи овој популарен музички натпревар.
