Американските власти порачаа дека САД ќе ја елиминираат заканата што Иран ја претставува за Блискиот Исток, во услови на интензивирање на воените операции во регионот.
Амбасадорот на САД во Обединетите нации, Мајк Валц, изјави дека воените операции против Иран имаат за цел да ја отстранат, како што рече, „заканата која постои веќе 47 години“. Тој посочи дека резултатите од операциите во првата недела од конфликтот се значајни.
Според неговите тврдења, иранските воздухопловни сили биле сериозно ослабени, системите за противвоздушна одбрана уништени или онеспособени, а дел од морнарицата потопена, при што повеќе од 40 бродови наводно завршиле на дното на морето.
Валц нагласи дека американската администрација ја води оваа операција со аргумент дека е неопходно да се заштити американскиот народ и да се елиминира заканата што Иран ја претставува за регионот и сојузниците на САД.
Изјавата доаѓа во момент кога конфликтот на Блискиот Исток се заострува, со серија ракетни и воздушни напади меѓу Иран, Израел и нивните сојузници, што ја зголемува загриженоста од поширока регионална ескалација.
