Во јавноста се појавија видеа и информации дека Иран користи лажна воена опрема – надувливи макети на авиони, тенкови и системи за противвоздушна одбрана – како дел од стратегија за измама на противничките сили во актуелниот конфликт на Блискиот Исток.
Според тврдењата што кружат на социјалните мрежи и во неколку воени анализи, дел од оваа опрема наводно е набавена од Кина, а станува збор за специјални надувливи макети кои од воздух, дрон или сателит изгледаат како вистинска воена техника. Овие макети се поставуваат на писти, во бази или во пустински области за да изгледаат како реални цели.
Целта на ваквата тактика е да се збунат извидувачките системи и да се натераат непријателските сили да трошат скапи ракети и бомби врз лажни цели, додека вистинската опрема се преместува или се крие на други локации.
Во јавноста повторно се спомнува и старата воена анегдота која, според некои извори, се покажала како вистинита. Според неа, американски и израелски борбени авиони наводно бомбардирале насликани силуети на авиони на писти, кои Иран ги исцртал за да изгледаат како вистински летала од воздух.
Воени аналитичари често ја опишуваат оваа тактика со ироничната формула: „бомба од милион долари против боја од пет долари“, односно ситуација во која скапа муниција се користи против евтини лажни цели.
Иако ваквите методи изгледаат необично, измамата и дезинформацијата отсекогаш биле дел од воената стратегија. Во текот на Втората светска војна, на пример, сојузничките сили користеле надувливи тенкови и лажни бази за да ги измамат германските извидувачки служби.
Некои експерти велат дека Иран ја применува истата „персиска игра“ на стратегиска измама, со цел да ја намали ефикасноста на воздушните напади и да го заштити вистинскиот воен потенцијал.
Сепак, дел од овие информации засега не се официјално потврдени од независни извори, а аналитичарите предупредуваат дека видеата и тврдењата што се шират на интернет треба да се анализираат внимателно.
