Околу 30% од граѓаните во Македонија се соочуваат со прекумерна тежина, додека дури 65% имаат висок индекс на телесната маса, покажуваат последните податоци. Овие статистики се поразителни и ја ставаат дебелината во центарот на јавноздравствените предизвици на земјата.
Во знак на Светскиот ден на дебелината, Министерството за здравство заедно со Светската здравствена организација (СЗО) вчера започнаа кампања под мотото: „Круг на поддршка – За полесно слабеење, не осудувајте! Помогнете“. Целта е да се поттикне емпатија и колективна свесност за здравствените ризици што произлегуваат од вишокот килограми.
Д-р Ирфан Ахмети, претседател на Научното друштво за дебелина „ОБЕМ“, предупредува дека дебелината често останува „невидлива“ во медицинските картони. „На пациентите им се дијагностицираат последиците, дијабетес тип 2, хипертензија, срцеви и мозочни удари, неплодност, но ретко се препознава вишокот килограми како корен на овие проблеми“, објаснува тој.
Во потрага по конкретни решенија, Фондот за здравство предлага воведување на „данок на шеќер“. Како што информира директорот Сашо Клековски, оваа мерка има двојна цел: да ги поттикне граѓаните да се ориентираат кон поздрави навики и да ја мотивира индустријата да ги прилагоди рецептите кон помалку калорични и поздрави алтернативи.
СЗО предупредува дека состојбата е критична и кај децата. Секое трето дете во земјата има проблеми со тежината. Аким Али од СЗО нагласува дека освен правилната исхрана, важно е да се намали физичката неактивност, пушењето и консумацијата на алкохол, со цел да се создаде одржлив и здрав начин на живот за идните генерации.
