Еден невообичаен правен преседан во Њујорк, кој го држеше вниманието на јавноста со години, конечно доби свој епилог. Мики Барето, кој користеше необичен правен трик за да живее речиси бесплатно во луксузниот хотел „Њујоркер“, се изјасни за виновен за измама, со што заврши долготрајната правна битка со сопствениците на култниот објект, јави Вашингтон тајмс.
Барето и неговиот тогашен соработник, Метју Хенан, првпат стапнаа во соба на „Њујоркер“ во 2018 година, заедно платиле скромни 200 долари за една ноќ во соба број 2565. Но, таа ноќ се покажа дека ќе има далекусежни последици.
Имено, Барето се повика на ретко применетите одредби од Њујоршкиот Закон за закуп, кои на лица овозможуваат шестмесечно изнајмување на простории во објекти изградени пред 1969 година. Кога хотелската управа одбила да му даде формален договор за закуп, тој го однел случајот на Судот. На клучното рочиште, никој од правниот тим на хотелот не се појавил, па судијата, со оглед на тоа што зградата, според Барето, никогаш не била законски поделена на станови, му ја доделил контролата врз собата „во посед“. Ова, според неговото толкување, му дало право да престојува таму без да плаќа надомест, и постепено да се обиде да прошири ваквото „право“ на целата зграда.
Во текот на правната битка, Барето тврдеше дека судот му дозволил да престојува не само во сопствената соба, туку во целиот хотел, бидејќи објектот никогаш не бил официјално поделен. Оттаму произлезе и неговиот следен потег: обид да легитимира сопственост врз целата зграда преку лажен акт за сопственост што го поставил на јавниот интернет-портал на градот.
Сопствениците на „Њујоркер“, кооперативата „Свети дух“, црковна организација основана во Јужна Кореја од покојниот самопрогласен месија Сун Мјунг Мун, брзо реагираа со тужба. Тие го обелоденија обидот на Барето, кој дури ни не застанал само на „правното маневрирање“, во еден момент се обидел да им наплати наем на други гости на хотелот, користејќи го својот наводен „правен статус“.
Спорот траеше со години, а Барето поради своите активности беше конечно иселен од хотелот во 2024 година. Потоа следуваа неколку обвиненија за измама, а судот ја стави во центар и неговата ментална состојба. Најпрво, тој беше прогласен за неспособен да продолжи со судењето и беше упатен на психијатриски третман и терапија за зависности.
На крајот, како дел од договор со обвинителството на Окружната канцеларија во Менхетн, Барето се изјасни за виновен по обвинението за измама. Тој доби шест месеци затвор, кои веќе ги отслужи, и дополнителни пет години условна казна. Сега, по овој невообичаен пресврт, тој е на слобода, но под строга условна контрола, и под постојан судски надзор за да избегне нови правни последици.
