Тензиите меѓу Турција и Иран ескалираа, откако турските одбранбени сили повторно пресретнаа балистичка ракета која беше истрелана од иранска територија кон Турција. Во средина на оваа ескалација, турскиот претседател Реџеп Таип Ердоган истакна дека главната цел на неговата земја е да остане надвор од конфликтот.
„Наш приоритет е безбедноста и мирот за нашите 86 милиони граѓани. Турција мора да се одржи подалеку од овој оган“, изјави Ердоган на вчерашниот состанок со владините министри.
Веста за вториот ирански ракетен напад дојде истиот ден кога остатоците од ракетата паднаа на полињата околу јужниот град Газиантеп. Првата иранска ракета, истрелана неколку дена претходно, исто така беше успешно пресретната од турската воздушна одбрана.
Ердоган остро предупреди дека војната не смее да се прошири во регионот. „Балистичките ракети насочени кон нашата територија беа неутрализирани навремено, и јас многу јасно им дадов предупредување на иранските власти. Овој конфликт мора да заврши пред да се прошири“, подвлече тој.
Во обид да ги смири тензиите, турскиот лидер одржал низа телефонски разговори со повеќе од десетина светски лидери. Вчера навечер, Ердоган разговарал и со иранскиот претседател Масуд Пезешкијан, нагласувајќи дека Турција не прифаќа нелегални интервенции од Иран и дека таргетирањето на воени бази во регионот не е од корист за никого.
Министерот за надворешни работи на Турција, Хакан Фидан, додаде предупредување до Техеран: „Не сме лесно провоцирана земја. Разговаравме со нашите ирански пријатели и им порачавме дека ако ракетите случајно залутале, тоа е едно, но ако продолжи, нека бидат внимателни.“
