Претседателот на Владата, Христијан Мицкоски, изјави дека изградбата на капиталните инвестиции се одвива со забрзана динамика и дека во првите два месеца од годината и првите денови од март се реализирани околу 25 проценти од предвидените средства за 2026 година.
При увидот на градежните активности за изградбата на пречистителната станица во населеното место Кучевишка Бара, Мицкоски посочи дека и покрај зимскиот период, кога градежните активности се намалени поради временските услови, реализацијата на капиталните инвестиции е на високо ниво.
„Околу 10 милијарди денари се реализирани во првите два месеца и во првите пет дена од март, што претставува приближно 25 проценти од вкупно предвидените капитални инвестиции за 2026 година. Како што ќе се подобруваат временските услови и ќе се засилуваат градежните активности, очекувам оваа динамика дополнително да се зголемува“, изјави Мицкоски.
Тој изрази очекување дека со зголемувањето на инвестициите ќе расте и бруто домашниот производ, а граѓаните ќе ги почувствуваат резултатите од мерките за стабилизација на државата.
Премиерот им се заблагодари на градоначалниците, институциите, советниците и пратениците кои, како што рече, придонесуваат за реализација на проектите. Притоа нагласи дека со изградбата на пречистителната станица ќе се подобрат условите за жителите, а дел од населението од Општина Бутел ќе добие приклучок на системот.
Мицкоски изрази очекување проектот што поскоро да биде завршен и ставен во употреба, нагласувајќи дека ваквите инфраструктурни зафати се значајни за подобрување на квалитетот на живот на граѓаните.
