Вицепремиерот и министер за транспорт и врски Александар Николоски учествуваше на глобалниот форум „Transforming Transportation 2026“ во Вашингтон, организиран од Светска банка, каде говореше за значењето на инвестициите во клучните европски транспортни правци што минуваат низ Македонија.
Во своето обраќање Николоски ја истакна важноста на Паневропски коридор 10 и Паневропски коридор 8, нагласувајќи дека тие претставуваат стратешки транспортни врски кои ја позиционираат државата како важна транзитна точка во регионот.
Тој посочи дека инвестициите во инфраструктурата на овие коридори не се значајни само за економскиот развој, туку и за безбедноста и стабилноста на регионот.
„Инвестициите на коридорите во Македонија го комбинираат бизнисот и безбедноста. Со ваквите проекти испраќаме позитивни сигнали до инвеститорите и ја зајакнуваме економската перспектива на државата“, напиша Николоски на социјалните мрежи по неговото учество на форумот.
Според него, геостратешката позиција на Македонија е од особено значење бидејќи токму на нејзината територија се вкрстуваат двата паневропски коридори, што ја прави клучна точка за транспорт, трговија и економска соработка во Југоисточна Европа.
…
