Рано утрово во југоисточниот дел на Турција, жителите на градот Адана беа разбудени од силниот звук на сирени што се огласија од воздухопловната база Инџирлик, стратешки објект на НАТО, каде се стационирани и американски трупи. Според првичните извештаи, сирените се огласиле околу 3:25 часот и алармот траел околу пет минути, пред базата да биде ставена во црвена тревога.
На социјалните мрежи се појавија видеа од небото каде се гледа светлечки објект што лета кон базата, што го поттикнува впечатокот дека станува збор за проектил насочен кон Инџирлик. Инцидентот доаѓа само четири дена откако турската и НАТО воздушна одбрана собори балистичка ракета, за која се верува дека била испукана од Иран. Следниот ден Турција ја предупреди Иран да не презема провокативни дејства.
СНИМКИТЕ МОЖЕТЕ ДА ГИ ПОГЛЕДНЕТЕ ТУКА
САД претходно издадоа упатство за затворање на конзулатот во Адана и ги повикаа своите граѓани да ја напуштат југоисточна Турција.
Базата Инџирлик е една од најзначајните НАТО објекти во регионот на Блискиот Исток и источниот Медитеран. Отворена во 1955 година како заедничка турско-американска инсталација, таа игра клучна улога во мисиите на НАТО во Сирија и Ирак. Во неа се стационирани околу 5.000 американски војници, дополнети со турски и други сојузнички трупи.
Инџирлик е позната и како складиште на тактички нуклеарни бомби Б61, дел од програмата „nuclear sharing“ на НАТО. Се проценува дека во базата има 20 до 30 вакви бомби, кои формално се сопственост на САД, но се интегрирани во алијансната стратегија за одвраќање.
