Повикот на американскиот претседател Доналд Трамп до повеќе светски сили да испратат воени бродови за обезбедување на Ормускиот Теснец засега не доби конкретна поддршка. Според информациите што се појавија во меѓународните медиуми, повеќето држави реагирале претпазливо или директно одбиле да учествуваат во евентуална поморска мисија во регионот.
Неколку земји веќе соопштиле дека нема да испратат воени бродови. Франција официјално го одбила барањето, додека Германија и Норвешка исто така не планираат да учествуваат во евентуален конвој за обезбедување на пловидбата.
Велика Британија соопшти дека ги разгледува опциите и разговара со сојузниците, но засега нема донесено конечна одлука. Кина не даде конкретен одговор, нагласувајќи дека безбедноста на пловидбата е прашање на суверено право на државите.
Азиските економии исто така остануваат внимателни. Јапонија не излезе со официјален став, иако околу 70 проценти од јапонската нафта од Блискиот Исток поминува токму низ Ормускиот Теснец. Јужна Кореја исто така не потврди евентуално учество, бидејќи се наоѓа меѓу безбедносниот сојуз со САД и сопствената енергетска зависност од регионот.
Во меѓувреме, тензиите во регионот продолжуваат да растат. Катар соопшти дека привремено го запрел дел од производството на гас и прогласил виша сила, а неговиот министер за енергетика предупреди дека ескалацијата може да има сериозни последици за светската економија.
Од друга страна, земјите од Заливот, вклучително и Обединетите Арапски Емирати, се обидуваат дипломатски да ја намалат ескалацијата на конфликтот, свесни за можните последици врз глобалните енергетски пазари.
Во исто време, Иран продолжува со активности во регионот, вклучително и напади врз бродови и поставување поморски мини, што дополнително ја зголемува загриженоста за безбедноста на Ормускиот Теснец.
Овој теснец е една од најважните поморски рути во светот, бидејќи преку него минува околу 20 проценти од глобалната трговија со нафта. Поради тоа, секоја ескалација во регионот може да предизвика сериозни потреси на светските енергетски и финансиски пазари.
