Додека Иран продолжува да лансира стотици нападни дронови низ Блискиот Исток, Соединетите Американски Држави сè повеќе се потпираат на искуството на Украина во борбата против ваквото оружје.
Според извештај на ABC News, украинските сили стекнале уникатно оперативно знаење за пресретнување и неутрализирање на ирански дронови, откако Русија во последните години ја напаѓа Украина со десетици илјади вакви летала.
Украина разви нов тип „пресретнувачки дронови“
Како одговор на масовните напади, Киев развил специјални дронови-пресретнувачи, чија задача е да ги уништуваат непријателските летала во воздух.
Овие системи се релативно евтини, брзо се произведуваат и можат да пресретнат цели како што се дроновите „Шахед“, кои често се користат во нападите врз украинските градови.
Според извештајот, украинското искуство сега го споделуваат со САД и нивните сојузници во Персискиот Залив, кои се соочуваат со растечка закана од дронски напади во регионот.
Во последните години дроновите се покажаа како едно од најопасните и најевтините оружја на модерното војување. Нивното производство чини меѓу 30.000 и 50.000 долари, што е значително поевтино од традиционалните ракетни системи.
Токму поради тоа, сè повеќе држави инвестираат во технологии за детекција, електронско заглушување и пресретнување на беспилотни летала.
Украина, која веќе со години се брани од масовни дронски напади, денес се смета за една од земјите со најголемо практично искуство во борбата против ова оружје.
