Македонската заедница во Западна Австралија на 21 и 22 март 2026 година во Перт ќе организира свечена прослава по повод 40-годишнината од официјалното отворање на Паркот Македонија, кој е еден од најзначајните симболи на македонската дијаспора во Австралија.
Јубилејот одбележува четири децении од отворањето на Паркот Македонија на 22 март 1986 година, место кое со години претставува централно собиралиште на Македонците во Западна Австралија и симбол на нивното културно наследство, придонес и заедништво.
Во прогласот на Македонската заедница на Западна Австралија, потпишан од претседателот на Фудбалскиот клуб „Стирлинг Македонија“, Лук Павлос, се упатува покана до членовите на заедницата и нивните семејства да присуствуваат на прославата и да учествуваат во богатата програма.
Дводневната манифестација ќе ја претстави македонската култура, спорт и традиција. Во рамки на програмата се предвидени штандови со македонска храна, ракотворби и културни производи, традиционални музички и танцови изведби, паради на фудбалската заедница и јуниорски фудбалски натпревари, семејни активности и игри, културни презентации, како и дерби натпревар меѓу ФК „Стирлинг Македонија“ и ФК „Олимпик Кингсвеј“. Предвидена е и вечерна коктел-програма со свечени презентации.
Прославата започнува во сабота, 21 март, во 11:00 часот, додека официјалниот дел е закажан за 16:00 часот. Во 18:00 часот ќе се одигра презентациски натпревар, а од 20:00 часот ќе следуваат коктели и свечени обраќања. Влезот ќе биде бесплатен до 16:00 часот, а по тој термин бесплатен влез ќе имаат сите членови на Македонската заедница на Западна Австралија со важечка членска карта.
Вториот ден, во недела на 22 март, ќе биде посветен на културната заедница со настапи на јуниорски тимови, традиционални танци, музика во живо и семејна пикник атмосфера. Настаните ќе се одржуваат од 9:30 до 16:00 часот, а влезот ќе биде бесплатен за сите посетители.
Организаторите упатија и јавна покана до членовите на заедницата кои сакаат да учествуваат со штандови со храна, ракотворби или културни содржини да се пријават, со цел навремена организација на просторот и логистиката.
Од Македонската заедница на Западна Австралија истакнуваат дека овој јубилеј претставува значаен момент за одбележување на историјата и придонесот на Македонците во регионот и можност за заедничко славење на културата и традицијата.
