Јапонија се подготвува да интервенира на енергетскиот пазар со пуштање на значајни количини нафта од своите стратешки резерви, во услови на сериозна неизвесност околу глобалните нафтени текови. Одлуката доаѓа поради очекуваниот пад на увозот на сурова нафта кон крајот на март, како последица на затворањето на Ормускиот теснец, една од најкритичните поморски рути за транспорт на енергенси во светот.
Главниот секретар на јапонскиот кабинет, Минору Кихара, изјави дека владата ќе направи сè што е потребно за нафтата од резервите брзо и непречено да стигне до пазарот. Според него, властите внимателно ја следат ситуацијата и ќе продолжат со координација со меѓународните партнери за да се гарантира стабилно снабдување со енергија, без исклучување на дополнителни мерки доколку тоа биде неопходно.
Потегот на Токио се вклопува во пошироката стратегија на земјите членки на Меѓународната агенција за енергија (ИЕА), која најави координирано ослободување на нафта од резервите на 32 држави. Планот предвидува на светскиот пазар да бидат пласирани околу 400 милиони барели, како одговор на прекините во снабдувањето предизвикани од новата ескалација на конфликтот на Блискиот Исток.
Јапонската влада, покрај ослободувањето на државни резерви, реши привремено да ги олесни и правилата за задолжителните резерви што мора да ги одржуваат рафинериите и нафтените трговци. Наместо досегашните 70 дена, минималното ниво на резерви ќе биде намалено на 55 дена, со цел дополнително да се зголеми количината на нафта што може брзо да се стави во промет.
Премиерката Санае Такаичи минатата недела објави дека од стратешките складишта ќе бидат ставени на располагање околу 80 милиони барели сурова нафта – најголемата количина што земјата некогаш ја пуштила од своите резерви. Овој обем е доволен да ја покрие приближно 45-дневната домашна потрошувачка и е значително поголем од интервенцијата по катастрофалниот земјотрес и цунами во 2011 година, кога беше ослободена далеку помала количина.
Според официјалните податоци, до крајот на 2025 година Јапонија располагала со околу 470 милиони барели нафта во резерви, што одговара на 254 дена национална потрошувачка. Од нив, резерви за 146 дена се во сопственост на државата, 101 ден ги држи приватниот сектор, додека остатокот се складира во рамки на заеднички договори со земји производители на нафта.
Ова ќе биде седми случај Јапонија да посегне по своите нафтени резерви откако системот за нивно формирање беше воспоставен во 1970-тите години.
Земјата е особено чувствителна на нарушувања во снабдувањето од Блискиот Исток, од каде што доаѓаат повеќе од 90 проценти од нејзиниот увоз на сурова нафта. Затворањето на Ормускиот теснец, клучната артерија за извоз на нафта и гас од Персискиот Залив, сериозно го загрози транспортот на енергенси и придонесе за нагло поскапување на суровата нафта, откако на 28 февруари избувна новата војна во регионот.
