Два американски воени брода наменети за противмински операции се наоѓаат илјадници километри далеку од Персискиот Залив, во време кога растат тензиите во регионот и се зголемуваат ризиците за безбедноста на клучните поморски рути.
Според извештаи на воени аналитичари, бродовите USS Tulsa (LCS-16) и USS Santa Barbara (LCS-32) биле забележани на контејнерски терминал во Пенанг, на околу 3.500 наутички милји оддалеченост од Ормускиот теснец – еден од најважните светски морски коридори за транспорт на нафта.
Станува збор за два модерни брода од класата „Independence“, дел од програмата за литорални борбени бродови на Американската морнарица. Нивната задача е откривање и неутрализирање морски мини, со цел да се обезбеди безбедноста на поморскиот сообраќај.
Овие бродови требаше да ги заменат постарите, но докажани миноловци од класата „Avenger“. Сепак, програмата со години е предмет на критики поради високите трошоци и техничките проблеми со системите за беспилотни операции и сонарска детекција.
Секој од овие бродови чинел меѓу 360 и 400 милиони долари, а некои од раните модели достигнале цена и до 700 милиони долари. Годишното одржување, пак, се проценува на 50 до 70 милиони долари.
Според извештаи од американската морнарица, дел од беспилотните системи покажале проблеми со сигурноста, а подготовката за мисија може да трае повеќе часови. Критичарите предупредуваат дека во реални борбени услови ваквите ограничувања можат да претставуваат сериозен ризик.
Во меѓувреме, аналитичарите наведуваат дека отсуството на специјализирани противмински бродови во близина на Ормускиот теснец може да создаде безбедносен вакуум во еден од најважните енергетски коридори во светот, преку кој се транспортира околу 20 проценти од глобалната нафта.
