Цените на нафтата на светските берзи попладнево забележаа пад откако првите танкери успешно поминаа низ Ормускиот теснец, што ја зголеми надежта кај трговците дека клучниот поморски пат за транспорт на енергенси повторно ќе функционира и покрај тензиите на Блискиот Исток.
Според берзанските податоци, цената на суровата нафта во 15:00 часот се намали за 5,56 проценти и изнесуваше 93,222 долари за барел, додека цената на нафтата од типот Брент падна за 2,62 проценти и достигна 100,386 долари за барел.
Американскиот министер за финансии Скот Бесант изјави дека Соединетите Американски Држави им дозволуваат на иранските танкери да поминуваат низ Ормускиот теснец со цел да се обезбедат доволни количини на нафта за светските пазари. Тој оцени дека во наредните месеци цените на нафтата најверојатно ќе паднат значително и би можеле да бидат под 80 долари за барел.
Американскиот претседател Доналд Трамп во меѓувреме побара од сојузниците да помогнат во обезбедувањето на поморскиот сообраќај низ теснецот и да учествуваат во заштитата на танкерите.
Трамп потврди дека САД наредиле воздушни напади врз ирански воени цели на островот Харг, но нагласи дека објектите на нафтената инфраструктура засега не биле цел на нападите. Сепак, тој предупреди дека Вашингтон би можел да ги таргетира и нафтените постројки доколку Иран продолжи со напади врз танкери.
Американскиот амбасадор во Обединетите нации Мајк Валц изјави дека постои можност за прецизни напади врз иранската нафтена инфраструктура доколку ескалира ситуацијата.
Според податоците, околу 90 проценти од извозот на иранска нафта се одвива токму преку островот Харг, каде што производството во февруари изнесувало околу 3,2 милиони барели дневно.
