Вистинска драма се случила во романскиот округ Арџеш, каде маж вооружен со сабја и штит нападнал минувачи и се судрил со специјалните полициски сили. Инцидентот предизвикал паника кај граѓаните, а полицијата била принудена да употреби оружје за да го совлада напаѓачот.
Според информациите на медиумите, мажот прво почнал да напаѓа луѓе на улица, фрлајќи камења кон минувачи и автомобили. Подоцна се искачил на покрив од објект во изградба, од каде продолжил да предизвикува хаос и да ги провоцира полициските службеници кои биле повикани на местото на настанот.
Кога пристигнале специјалните полициски единици, ситуацијата дополнително ескалирала. Во еден момент напаѓачот се обидел со сабјата да нападне припадник на специјалната единица САС. Полицијата прво испукала предупредувачки истрели, а потоа употребила огнено оружје и го ранила во ногата за да го спречи нападот.
покрај раните, мажот продолжил да им се заканува на полицајците и да се спротивставува на апсењето. За негово совладување биле употребени солзавец, шок-бомби и други средства, а на местото на настанот бил повикан и полициски преговарач.
По интервенцијата, напаѓачот бил пренесен во итната болница во Питешти, каде му била укажана лекарска помош. Неговата здравствена состојба не е животно загрозувачка.
Полицијата соопшти дека истиот човек е осомничен и за претходен инцидент во кој пред неколку дена уништил локална автоперална. Истрагата продолжува, а мотивот за нападот засега не е познат.
…
