Германскиот канцелар Фридрих Мерц денеска категорично соопшти дека Германија нема да учествува во конфликтот што се одвива меѓу Соединетите Американски Држави и Израел против Иран. На прес-конференција во Берлин, Мерц истакна дека одлуката е мотивирана од уставните ограничувања и недостатокот на соодветен меѓународен мандат.
„Нашиот Основен закон бара дозвола од Обединетите нации, Европската Унија или НАТО за какво било учество во воени операции. Таква одлука сега не постои“, изјави Мерц, појаснувајќи дека НАТО е исклучиво одбранбен сојуз и не служи за напади.
Канцеларот дополнително нагласи дека Германија не била консултирана пред почетокот на воените акции. „САД и Израел не побараа наш совет ниту еднаш, и никогаш не се дискутираше за заедничко дејствување против Иран. Затоа прашањето за германско воено учество воопшто не доаѓа пред нас“, додаде Мерц, ставајќи крај на сите шпекулации околу можната улога на Германија.
