Американскиот претседател, Доналд Трамп, кој во јуни ќе наполни 80 години, во јавните настапи сè почесто покажува неповрзан и нејасен говор, контрадикторни изјави и проблеми со меморијата, што создава загриженост за безбедноста на глобално ниво, особено во контекст на воените операции на САД и Израел против Иран.
На неодамнешна прес-конференција и интервјуа, Трамп неколку пати сам себеси си противречеше во изјавите за американската стратегија кон Иран и коалицијата за безбедност на Ормускиот теснец. Во само неколку минути, тој истовремено тврдеше дека помошта од сојузниците не е потребна, но и дека би сакал таа да пристигне.
Тој исто така прави изјави кои немаат врска со темата, како што беше случајот со ветрениците за време на разговорот со претседателката на Европската комисија, Урсула фон дер Лајен, и неколку пати е забележан како заспива за време на јавни настани.
Психијатрите предупредуваат дека ваквото однесување, вклучувајќи ги контрадикторните изјави, бришењето на детали и фантазирањето, може да укажува на когнитивно нарушување, логореја и можни знаци на деменција. Анализите покажуваат дека Трамп тешко ја одржува координацијата на говорот и контролата на импулсите, што дополнително ја усложнува способноста за рационално донесување одлуки.
Анкетите покажуваат растечка загриженост меѓу американската јавност: 61% од анкетираните сметаат дека Трамп станал непредвидлив, а дури 30% од републиканците се согласуваат со тоа. Стапката на граѓани кои веруваат дека е „ментално присебен“ паднала од 54% во септември 2023 на 45% денес.
Експертите истакнуваат дека проблемот се засилува поради неговото опкружување, каде што најблиските соработници му повладуваат и не го предизвикуваат. Уредникот на Financial Times, Едвард Лус, предупредува дека ова создава сериозна геополитичка опасност, бидејќи најмоќниот човек во светот донесува импулсивни одлуки без јасна стратегија во време на воен конфликт.
Ситуацијата ја оценуваат како „опасна комбинација“ на непредвидлив претседател, војна и опкружување кое не се осмелува да го критикува, што може да има сериозни последици за регионалната и глобалната безбедност.
…
