Србија планира во текот на оваа година да ја започне изградбата на новиот гасен интерконектор со Северна Македонија, кој според најавите треба да биде ставен во функција на почетокот на 2028 година. Ова беше истакнато на средбата меѓу српската министерка за рударство и енергетика Дубравка Ѓедовиќ Хандановиќ и грчкиот министер за енергетика и животна средина Ставрос Папаставру.
Во фокусот на разговорите била енергетската транзиција, диверзификацијата на снабдувањето со енергенси, како и влијанието на случувањата на Блискиот Исток врз енергетскиот сектор во регионот.
Според најавите, Србија ќе гради два нови гасни интерконектори – со Северна Македонија и со Романија, со што ќе се обезбедат над 4 милијарди кубни метри дополнителен гас годишно. Капацитетот на интерконекторот со Северна Македонија се проценува на околу 1,5 милијарди кубни метри.
„Со овој проект ќе обезбедиме нови рути за снабдување со гас од различни извори, вклучително и преку ТАНАП и ЛНГ терминалите во Грција, со што ќе се зајакне енергетската безбедност“, истакна Хандановиќ.
На средбата била нагласена и потребата од поголема регионална координација во енергетиката, при што било посочено дека соработката меѓу Србија, Грција, Северна Македонија и Бугарија е од клучно значење за стабилноста во Југоисточна Европа.
Осврнувајќи се на цените на горивата, српската министерка оцени дека состојбата на глобалниот пазар е сериозен предизвик. Таа посочи дека државата веќе интервенирала за да спречи ценовен шок, нагласувајќи дека реалната цена би можела да достигне 240 до 250 динари, но Владата има намера да ги задржи цените на пониско ниво. За 20 март беше најавена нова одлука за цените што ќе важат во следниот период.
Дополнително, на средбата се разговарало и за развојот на обновливите извори на енергија. Грчкото искуство било посочено како пример, имајќи предвид дека повеќе од половина од електричната енергија во Грција се произведува од обновливи извори. Србија, пак, има цел до 2030 година да достигне 3,5 гигавати инсталиран капацитет и 45 проценти удел на зелена енергија.
Во однос на европската интеграција, Србија ги завршила неопходните чекори за приклучување кон пазарот на електрична енергија на Европската Унија, а процесот на одобрување од европските институции е во тек. Доколку се реализира, земјата би станала првата што ќе се приклучи на овој пазар без да биде членка на ЕУ.
