Американските вооружени сили и нивните сојузници ја засилија операцијата за повторно отворање на Ормускиот Теснец, клучниот воден пат низ кој минуваат околу 20% од светскиот извоз на нафта. Јуришни авиони и хеликоптери „Апачи“ дејствуваат во ниски летови за уништување на иранските брзи чамци, мини и крстосувачки ракети, кои од почетокот на март го блокираат сообраќајот во теснецот.
Засилената операција е дел од повеќефазен план на Пентагон, чија цел е намалување на заканата од иранските вооружени глисери и дронови. Доколку заканата се намали, САД планираат да испратат воени бродови кои ќе ги придружуваат цивилните бродови низ теснецот.
Цените на суровата нафта веќе реагираа на блокадата, достигнувајќи над 100 долари за барел, а администрацијата на претседателот Доналд Трамп веќе презема мерки за ублажување на економските последици.
Американските хеликоптери „Апачи“ и авиони А-10 Warthog таргетираат ирански брзи дронови и чамци, додека базите и позициите за крстосувачки ракети на Корпусот на Исламската револуционерна гарда се предмет на бомбардирање. Сепак, експертите предупредуваат дека Иран сè уште има стотици чамци и мини сместени во сокриени тунели, што го продолжува ризикот за безбедниот премин на бродовите.
Покрај тоа, единица од околу 2.200 американски маринци е на пат кон Блискиот Исток, каде би можеле да учествуваат во заземање на островите покрај јужниот брег на Иран и во обезбедување на повторното отворање на Ормускиот Теснец.
Во меѓувреме, Иран најави дека може да започне наплата за премин низ теснецот, што дополнително ја зголемува геополитичката напнатост и создава можност за „присилна меѓузависност“ со земјите кои зависат од енергија од Персискиот Залив.
Американските официјални лица истакнуваат дека операцијата ќе трае недели, а целосна безбедност во теснецот можеби никогаш не може да се гарантира, поради сложената мрежа на мини, дронови и чамци што Иран ги има поставено.
U.S. forces are destroying Iranian naval targets that threaten international shipping in and near the Strait of Hormuz. pic.twitter.com/qR6FJyI5ZS
— U.S. Central Command (@CENTCOM) March 19, 2026
…
