Сè погласни се предупредувањата дека глобалната енергетска криза, поттикната од воените случувања и растот на цената на нафтата, може сериозно да влијае врз секојдневниот живот на граѓаните ширум светот.
Според анализи што кружат во јавноста, растот на цената на нафтата – кој веќе се движи кон 110 долари за барел, со прогнози дека може да достигне и до 150 или 175 долари – би можел да предизвика домино ефект врз целата економија.
Во такво сценарио, авиокомпаниите веќе почнуваат да ги намалуваат летовите поради високите трошоци, додека транспортот и логистиката стануваат значително поскапи, што директно влијае врз цените на производите во продавниците.
Дополнителен проблем претставува снабдувањето со ѓубрива и други ресурси, што може да доведе до раст на цените на храната, особено ако се нарушат клучните трговски рути како Ормускиот теснец.
Глобалната енергетска криза предизвикана од конфликтите на Блискиот Исток веќе носи конкретни последици во повеќе земји, каде властите воведуваат мерки за штедење гориво и енергија.
Во Шри Ланка, ситуацијата е најдрастична – воведен е четиридневен работен неделник за да се штеди гориво, а возачите се ограничени на околу 15 литри неделно. Дополнително, државните институции и училиштата работат со скратено време, а се препорачува и работа од дома.
Во Бангладеш, исто така е воведено рационализирање на горивото, а владата бара милијарди долари за да обезбеди доволни количини енергенси. Земјата е силно зависна од увоз и веќе се соочува со сериозен притисок.
Во Филипини, владата воведе мерки за намалување на потрошувачката на енергија – институциите мора да ја намалат потрошувачката за најмалку 10%, се разгледува четиридневна работна недела, а се охрабрува и работа од дома.
Во Тајланд, Виетнам и Индонезија, властите преземаат комбинација од мерки – ограничување на потрошувачката, зголемување на користењето алтернативни горива и дури размислување за рационализација на енергијата.
Во Јапонија и Јужна Кореја, иако нема класично „рационирање“, државите веќе користат резерви, воведуваат ценовни ограничувања и го зголемуваат користењето на други извори на енергија за да спречат недостиг.
Во Австралија, цените на горивата растат драматично, а владата предупредува на можни нарушувања во снабдувањето и ги активира резервите за да спречи криза.
Во поширок контекст, дел од државите веќе почнуваат да препорачуваат намалување на патувањата, ограничување на потрошувачката и штедење енергија – мерки кои потсетуваат на оние од времето на пандемијата, но сега со енергетска позадина
Иако ваквите сценарија не значат дека светот се движи кон нов „локдаун“ како во времето на пандемијата, експертите предупредуваат дека можни се одредени ограничувања и промени во навиките, особено ако кризата се продлабочи.
Засега, официјалните институции не најавуваат рестрикции од типот на забрана на движење, но енергетската нестабилност останува еден од најголемите ризици за глобалната економија во наредниот период.
