Европа повторно го покажува својот глобален статус кога станува збор за урбан живот и квалитет на живеење. Од годинешната листа на престижниот магазин за патувања Time Out, 50 најдобри градови во светот, дури 19 се наоѓаат на стариот континент, потврдувајќи дека европските метрополи не само што го следат темпото на светските гиганти, туку и поставуваат стандарди во многу аспекти на градскиот живот.
Глобалната анкета, спроведена меѓу повеќе од 24.000 жители од 150 градови, во комбинација со мислењата на над 100 експерти за урбан развој, ги рангира градовите според критериуми како што се квалитет на живот, прифатливост, уметност и култура, гастрономија, ноќен живот и зелени површини.
На врвот на листата се најде Мелбурн, додека европското „тројче“ се предводи од Единбург, кој се закити со третото место глобално, веднаш пред Лондон. Во првите десет, покрај овие два града, се најдоа и Шангај на второ место, Њујорк, Кејптаун, Мексико Сити, Бангкок, Сеул и Токио.
Жителите на Единбург го истакнуваат градот како идеален за пешачење, со богата гастрономска понуда, обилство зелени површини и жива културна сцена. Според Time Out, 91% од испитаниците се изјасниле дека го доживуваат секојдневниот живот како радост. Лондончани, пак, го пофалија својот град за врвната уметничка и културна сцена, која доби 99% позитивни оценки, заедно со ресторани и зелените површини.
Меѓу континенталните европски градови, Цирих се најде на 11-то место, речиси во топ 10, благодарение на неговата привлечност во сите сезони – од црешовите цветови напролет и пливањето во Лимат лето, до филмскиот фестивал и светски познатите божиќни пазари. Следат Копенхаген (13), Краков (16), Порто (17), Мадрид (19) и Валенсија (20), што ја илустрира доминацијата на европските градови меѓу местата од 11-то до 20-то.
Интересно е дека Париз, градот кој го посетуваат милиони туристи секоја година, се најде само на 22-ро место. Сепак, француската престолнина доби максимални пофалби за уметност и култура, додека 97% од испитаниците позитивно ја оценија гастрономската понуда.
Меѓу другите европски претставници во првите 50 се Бат (26), Билбао (27), Берлин (28), Антверпен (31), Неапол (33), Амстердам (34), Атина (40), Виена (44), Даблин (45) и Лисабон (49).
