Европа се соочува со нова закана од Иран, кој, според европските медиуми, располага со балистички ракети што можат да стигнат до метрополите како Рим и Лондон. И покрај американските и израелските воени акции, Техеран останува со значителен ракетен потенцијал, кој не е неутрализиран.
Според италијанскиот весник „Ла Република“, за напад кон европски цели, Иран би морал да користи лансирни позиции во северните региони на земјата. Весникот предупредува дека во моментов Европа нема сопствен оперативен систем за одбрана од вакви закани, и дека безбедноста на континентот во голема мера зависи од американските сателити, радари и поморски капацитети — што ја прави одбраната ранлива.
Британски „Телеграф“ потсетува на неодамнешниот напад врз британска база во Индискиот Океан, користена од американското воздухопловство. Овој настан ја покажал потенцијалната дофатност на иранските ракети, кои би можеле да ја достигнат и британската престолнина.
Иран официјално соопшти дека лансирал две балистички ракети кон базата Диего Гарсија, што е на повеќе од пет илјади километри од Техеран. Воени експерти заклучуваат дека ова укажува на тоа дека вистинскиот дострел на иранското оружје е многу поголем отколку што се проценуваше досега.
