Народната банка на Македонија утре ќе ја организира големата Конференција на високо ниво на тема: „Централното банкарство во услови на постојани светски промени: поттикнување стабилност, иновации и издржливост“. Настанот, кој се одржува во соработка со Европскиот форум за европски пари и финансии (SUERF – The European Money and Finance Forum), ќе собере гувернери, високи претставници на централни банки, меѓународни финансиски институции и академици во Скопје на 24 март.
Конференцијата е замислена како платформа за интензивна размена на знаења и искуства, каде што експертите ќе ги разгледуваат најсвежите предизвици со кои се соочуваат централните банки, како и нивната клучна улога во обезбедувањето стабилен и отпорен финансиски систем во време на глобална неизвесност.
Настанот ќе го отвори гувернерот на Народната банка, д-р Трајко Славески, а ќе има обраќања и од премиерот Христијан Мицкоски и генералниот секретар на SUERF, Ернест Ган.
Програмата вклучува низа панел-дискусии кои ќе се фокусираат на макроекономските политики, управувањето со светски економски шокови и практиките што централните банки ги користат за одржување на финансиската стабилност. Еден од централните панели ќе биде посветен на дигитализацијата и иновациите, каде учесниците ќе ја разгледуваат улогата на новите технологии во модернизацијата на централните банки и нивното влијание врз финансискиот систем.
Исто така, ќе се одржи панел за финансиска стабилност, каде што ќе се дискутираат макропрудентните политики, нивната координација со другите економски мерки и потенцијалните ризици на пазарот на недвижности. Експертите ќе споделат практични искуства за тоа како се користат инструментите за зајакнување на отпорноста на финансискиот систем.
За оние кои нема да можат да присуствуваат лично, конференцијата ќе биде достапна во живо на каналот на Народната банка на „Јутјуб“.
