ФИФА изненади многу хотели во Филаделфија со масовни откажувања на резервации за Мундијалот 2026, објави „The Independent“. Според локалното Здружение на хотелиери на Голема Филаделфија, околу 2.000 соби беа откажани, главно во четири хотели сместени во централното подрачје на градот.
Претседателот на здружението, Ед Гроуз, изјави за „ABC 6“ дека ФИФА не ги образложила причините за откажувањата, но дека акцијата била во согласност со условите на договорите и не подразбира казни за федерацијата. Тој додаде дека слични откажувања се случуваат и во други американски градови кои ќе бидат домаќини на Светското првенство.
Гроуз ја советуваше јавноста да не ги откажува веќе направените резервации, истакнувајќи дека откажаните соби наскоро ќе бидат достапни за навивачите кои планираат да дојдат во Филаделфија. Тој додаде дека две големи конвенции ќе се одржат во градот приближно во исто време со натпреварите, па сместувањето најверојатно нема да претставува проблем.
Веста од Филаделфија следи по извештајот од почетокот на март дека ФИФА откажала околу 40 проценти од хотелските резервации во Мексико Сити. Организаторите очекуваат Мундијалот, кој ќе се одржи во градови низ САД, Мексико и Канада, да привлече меѓу пет и 6,5 милиони навивачи.
