САД го поставиле 9 април како можен датум за завршување на војната со Иран, додека паралелно се очекува интензивирање на дипломатските напори меѓу двете страни, пренесуваат израелски медиуми.
Според весникот Yedioth Ahronoth, израелски функционер изјавил дека Вашингтон веќе го дефинирал овој рок, оставајќи простор од околу три недели за комбинирање на воени активности и преговори.
Истиот извор посочува дека разговорите меѓу Техеран и Вашингтон би можеле да започнат во текот на неделата во Пакистан, но нагласува дека Израел не бил детално информиран за текот на контактите.
Во извештаите се наведува и дека САД веќе воспоставиле индиректна комуникација со претседателот на иранскиот парламент, Мохамед Багер Калибаф. Сепак, тој ги демантираше овие информации, оценувајќи ги како „лажни вести“ насочени кон влијание врз финансиските и енергетските пазари.
Американскиот претседател Доналд Трамп претходно изјави дека наредил привремено одложување на нападите врз иранската енергетска инфраструктура, посочувајќи дека причината се „многу добри и продуктивни“ разговори со Техеран.
Воениот конфликт, кој ескалираше на 28 февруари со заедничка офанзива на САД и Израел, досега однесе над илјада животи. Меѓу загинатите е и поранешниот врховен лидер на Иран, Али Хамнеи.
Како одговор, Техеран изврши напади со ракети и беспилотни летала врз Израел и повеќе земји во регионот, вклучително Јордан, Ирак и држави од Персискиот Залив, што предизвика дополнителни жртви, материјална штета и нарушувања на глобалните пазари и воздушниот сообраќај.
