Шефот на Централната команда на САД (CENTCOM), адмиралот Бред Купер, изјави дека Иран „дејствува од очај“ со таргетирање цивилни цели во тековниот конфликт.
Во интервју за Iran International, Купер нагласи дека во последните недели се регистрирани стотици напади врз цивилни цели, што, според него, ја покажува слабоста на иранската стратегија.
Тој посочи дека нападите врз цели низ Блискиот Исток се намалиле во интензитет како што конфликтот влегува во подолга фаза.
„На почетокот видовме десетици беспилотни летала и ракети. Тоа сега веќе не е случај“, изјави Купер.
Според него, САД и Израел не се фокусираат само на тековните закани, туку систематски ги таргетираат и капацитетите за производство на ракети и дронови, со цел долгорочно да ја намалат воената моќ на Иран.
Купер истакна и дека моментално не е време за масовни протести во Иран, но најави дека во одреден момент ќе има јасен сигнал кога граѓаните ќе можат да излезат на улиците.
„Засега мора да останете внатре, но ќе дојде момент кога ќе има јасен сигнал“, рече тој.
Воедно, адмиралот направи споредба меѓу високите воени функционери и обичните војници, нагласувајќи дека раководството се наоѓа во добро заштитени објекти, додека војниците на терен се изложени на ризик.
„Генералите се во длабоки бункери, додека војниците се незаштитени“, додаде Купер.
