Министерката за енергетика, рударство и минерални суровини, Сања Божиновска, заедно со премиерот Христијан Мицкоски и министерот за транспорт Александар Николоски, присуствуваше на свеченото отворање на новата 100/35 киловолтна трафостаница „Централна“ во Скопје, инвестиција на ЕВН.
Како што истакна Божиновска, динамичниот развој на Скопје бара современа, стабилна и отпорна енергетска инфраструктура, а новата трафостаница претставува клучно решение за надминување на постојните ограничувања во системот.
„Со оваа инвестиција вредна 22 милиони евра, се создаваат услови за сигурно снабдување со електрична енергија, но и простор за понатамошен урбан и економски развој на градот“, посочи министерката.
Таа нагласи дека проектот е резултат на координирана соработка меѓу државните институции, енергетските компании и стручната јавност, со заедничка цел – изградба на модерен и одржлив енергетски систем.
Божиновска потенцираше дека Министерството за енергетика останува посветено на модернизација на критичната инфраструктура, зајакнување на сигурноста на снабдувањето и имплементација на нови технологии, кои ќе го следат урбаниот развој.
„Скопје заслужува сигурна и стабилна енергија“, порача Божиновска, додавајќи дека ваквите инвестиции се основа за идниот развој и енергетската стабилност на државата.
