Италија го започна плејофот за Светското првенство со убедлива победа над Северна Ирска (2:0), но селекторот Џенаро Гатузо веќе го гледа следниот предизвик, мечот против Босна и Херцеговина на 31 март во Зеница.
Гатузо нагласи дека неговиот тим го очекува навистина тешка битка. „Босна и Херцеговина игра 4-4-2 и е составена од искусни играчи кои знаат како да се затворат во одбраната и да искористат секоја шанса напред. Очекуваме жешка атмосфера на стадионот. Натпреварот со Северна Ирска ни покажа дека нема лесни средби, но ова ќе биде уште поголем предизвик“, изјави италијанскиот стратег.
За Гатузо овој плејоф е многу повеќе од обичен натпревар. „Се искачивме само на првата карпа. Босна и Херцеговина за нас е како Монт Еверест – мораме да се искачиме до врвот. Влогот е огромен, нема простор за потценување“, додаде тој.
Селекторот зборуваше и за состојбата со играчите. Дефанзивецот Алесандро Бастони имаше тешкотии со повреда и речиси три недели не тренираше, па Гатузо го повлече од игра делумно поради жолт картон. Напаѓачот Џанлука Скамака има мали проблеми, но останатите играчи се подготвени. „Се враќаме во кампот во Коверчано, работиме на енергијата и подготовките. Скамака ќе биде со нас, а целта ни е да влеземе максимално подготвени на теренот“, заклучи Гатузо.
