И покрај случувањата на Блискиот Исток, странските инвеститори во Македонија засега не пријавуваат драстично намалување на нарачките. Сепак, тие предупредуваат дека проблемот не се ограничува само на цената на горивата, ризиците се мултифацетни и можат да предизвикаат недостиг на керозин, алуминиум и други клучни материјали.
„Директно намалување сè уште нема, иако понекогаш на неделно ниво се забележуваат мали флуктуации. Ситуацијата е флуидна и сите чекаат да видат како ќе се развива. Не можам точно да кажам колку и дали ова ќе влијае на нашите клиенти“, изјави денеска Виктор Мизо, претседател на Советот на странските инвеститори.
Според Мизо, кризата е глобална и не бира локации, ја погодува индустријата еднакво и во Македонија и во другите држави. Сепак, токму во такви моменти се отвора можност компаниите да се позиционираат поконкурентно во однос на своите сестрински фирми во Европа. „Зголемените трошоци за енергенти, репроматеријали и петрохемиски суровини ќе се одразат на сите пазари. Но, ако успееме да бидеме пофлексибилни и поконкурентни, намалувањето на побарувачката тука може да биде помало отколку на другите локации. Дури и ако влијанието е неизбежно, секоја криза носи можност“, посочи Мизо.
Тој посочи дека само за време на блокадите на транспортерите, некои компании биле принудени да користат авионски превоз на производите, што резултирало со дополнителни трошоци од неколку илјади до неколку милиони евра по компанија.
„Компаниите јасно ни велат: ако не можете да ги апсорбирате овие трошоци, најдете алтернатива надвор од Западен Балкан. Доколку производството се префрли во која било од нашите сестрински компании во Европската Унија, тешко дека ќе се врати назад. Тоа е реален ризик“, предупредува Мизо.
