Американската администрација воведува невообичаена новина што веќе предизвикува бурни реакции: потписот на актуелниот претседател Доналд Трамп ќе се најде на новите изданија на доларските банкноти. Овој чекор претставува преседан, бидејќи досега на американските пари не се појавувало име на претседател кој е во моментот на функција.
Според најавите, првите банкноти од 100 долари со новиот потпис ќе влезат во печат веќе во јуни, а подоцна ќе следуваат и другите апоени. Традицијата што датира уште од 1861 година, според која единствено министерот за финансии става свој потпис на валутата, сега се менува. Актуелниот министер Скот Бесент ја оправда одлуката како симболично признание за, како што рече, „значајните историски успеси“ на претседателот.
Овој потег не е изолиран случај, туку дел од поширок бран на ребрендирање на јавни симболи и институции во чест на Трамп по неговото враќање во Белата куќа. Културни и инфраструктурни објекти, меѓу кои и Кенеди центар во Вашингтон, како и аеродромот во Палм Бич, веќе се на пат да добијат нови имиња поврзани со неговото наследство.
Дополнително, федерална комисија одобри и изработка на златна монета со негов лик, одлука што отвори дебата во јавноста. Критичарите предупредуваат дека ваквите чекори можат да се протолкуваат како обид за создавање култ на личноста, додека поддржувачите ги гледаат како заслужено оддавање почит.
