Претседателот на САД, Доналд Трамп, порача дека американските напади врз Иран ќе продолжат „непречено и непрекинато“, предупредувајќи дека Техеран ќе се соочи со „најлош кошмар“ доколку не се откаже од нуклеарните амбиции.
На првиот состанок на кабинетот од почетокот на конфликтот, Трамп истакна дека Иран има „шанса да избере нов пат“, но дека ако тоа не го стори, следува уште поинтензивна воена акција. Тој нагласи дека американската воена моќ е супериорна и дека напади ќе продолжат без прекини.
Претседателот додаде дека текот на конфликтот ќе зависи и од разговорите со Иран, кои се одвиваат зад сцената, но не прецизираше дали ќе се придржува до претходно најавениот рок за одлука. Тој потенцираше дека Иран дозволил премин на неколку нафтени танкери низ Ормускиот теснец, оценувајќи го тоа како „гест на добра волја“, но дека тоа нема да влијае врз подготвеноста на САД за понатамошни напади.
Во врска со глобалната енергетска криза, Трамп истакна дека САД располагаат со доволно сопствени ресурси, иако блокадите на теснецот влијаат врз светските цени на нафтата. Потпретседателот Џ.Д. Венс изјави дека иранската конвенционална војска е „ефикасно уништена“, додека државниот секретар Марко Рубио оцени дека интервенцијата претставува „услуга за светот“.
Трамп исто така упати критики кон НАТО, велејќи дека е „разочаран“ од недоволната поддршка за обезбедување на Ормускиот теснец и предупреди дека САД „ќе се сетат“ на однесувањето на сојузниците.
