Општините Пустец и Кичево официјално го зацврстија своето пријателство со потпишување договор за збратимување, отворајќи ново поглавје во меѓусебната соработка и развој.
Градоначалниците Пали Колефски и Александар Јовановски истакнаа дека овој чин претставува значаен исчекор кон градење долгорочни партнерства, засновани на заедничка историја, меѓусебна почит и визија за напредок.
Со договорот се предвидува продлабочување на соработката во повеќе области, меѓу кои културата, образованието, туризмот и локалниот економски развој. Двете општини ќе работат на размена на искуства, институционална поддршка и реализација на заеднички проекти кои ќе придонесат за подобрување на квалитетот на живот на граѓаните.
Во рамки на посетата, делегацијата ги посети локалните образовни и културни институции, како и значајни историски и духовни објекти, што дополнително ја нагласи поврзаноста меѓу двете заедници.
На настанот присуствуваа и претставници од централната власт и граѓанскиот сектор, што уште еднаш ја потврди важноста на ова партнерство.
Збратимувањето меѓу Пустец и Кичево испраќа силна порака за зајакнување на добрососедските односи и создава нови можности за регионална соработка и заедничка иднина.
