Американскиот претседател Доналд Трамп во интервју за Фајненшл тајмс изјави дека размислува за преземање на иранската нафта и дека американските сили би можеле да го освојат островот Харг, клучната локација за извоз на нафта на Иран.
– Мојата најголема желба би била да ја земам нафтата во Иран, иако некои луѓе во САД прашуваат „зошто да го правиме тоа?“, рече Трамп, додавајќи дека тие луѓе не разбираат, објави Фајненшл тајмс.
Трамп истакна дека можностите за Харг се отворени и дека преземањето на островот би значело долгорочно присуство на американските сили. Тој оцени дека иранските одбранбени сили таму се слаби и дека островот може да биде освоен „многу лесно“.
Изјавите дојдоа во време кога 3.500 дополнителни американски војници се распоредени на Блискиот Исток поради стравувањата од можни ирански напади. Трамп нагласи дека индиректните преговори меѓу САД и Иран преку пакистански посредници напредуваат, но не прецизираше дали е можно непосредно прекинување на огнот.
Во средината на март, американските сили извршија напад врз Харг, погодувајќи над 90 ирански воени цели, според Централната команда на САД (CENTCOM). Островот се наоѓа околу 500 километри северозападно од Ормутскиот теснец и е дом на најголемиот нафтен терминал во Иран, преку кој се извезуваат околу 90 проценти од иранската нафта.
…
