Управата за јавни приходи (УЈП) најави интензивни проверки на даночни обврзници кои вршат дејност без регистриран фискален систем. Според последните податоци, над 6.400 активни компании со вработени сè уште не користат фискален апарат, а меѓу нив повеќе од 3.100 се обврзници за ДДВ. Дополнително, УЈП најавува проверки кај речиси 14.000 други субјекти, со цел да утврди дали воопшто остваруваат деловна активност.
Контролите особено ќе се насочат кон дејности каде доминираат готовинските плаќања – трговијата, угостителството, туристичките услуги и други сектори на услуги. Инспекторите ќе проверуваат дали секој даночен обврзник има регистриран фискален систем и дали издава фискални сметки за секоја продажба или услуга.
Од УЈП нагласуваат дека непочитувањето на овие обврски нема да биде без последици, се предвидуваат парични казни, затворање на објектите, а во екстремни случаи може да следи и кривична постапка.
