Денес во Основниот кривичен суд во Скопје започнува судската постапка против Стојанче Јовановски, сопруг на трагично починатата Ивана, која на 2 март го загуби животот по пад од балкон заедно со нивната малолетна ќерка.
Обвинението, поднесено од Основното јавно обвинителство Скопје, го товари Јовановски за три сериозни кривични дела: нанесување телесни повреди во контекст на продолжено семејно насилство, загрозување на сигурноста, како и наведување и помагање при самоубиство.
Според наодите на обвинителството, станува збор за долготраен образец на сурово и понижувачко однесување кон сопругата, која се наоѓала во зависна и потчинета позиција. Таквата состојба, како што посочуваат обвинителите, кулминирала со трагичниот настан на 2 март, кога таа си го одзела животот, чин што институциите го поврзуваат со однесувањето на обвинетиот и неговата наводна небрежност.
Случајот ќе го води судијата Ивица Стефановски.
