Македонија повторно се наоѓа пред силен временски пресврт, откако нов бран на поладен воздух од север започнува да се спушта кон јужна и југоисточна Европа. Под негово влијание, над јужна Италија и Јонското Море се формира длабок секундарен циклон, кој директно ќе влијае врз времето во земјава.
Овој циклонски систем ќе донесе значително влошување на временските услови, почнувајќи од вторник навечер (31 март), а ефектите ќе се чувствуваат и во деновите што следуваат.
Во овој период се очекуваат обилни врнежи, кои во пониските делови ќе бидат од дожд, додека на повисоките места и на планините над 1000 метри ќе бидат од снег. Таму ќе дојде до значително зголемување на снежната покривка.
Најинтензивни врнежи се најавуваат за среда и четврток (1 и 2 април), кога локално се очекуваат над 50 литри дожд на метар квадратен. Во планинските региони и скијачките центри снежната покривка може да се зголеми за 40 до 50 сантиметри, а на одредени места и повеќе од 50 сантиметри.
Поради продорот на студениот воздух од север, снежната граница повремено ќе се спушта, особено во западните и северните делови од Македонија, па врнежи од влажен снег ќе има и во некои повисоки населени места.
Во Скопје и околината се очекуваат пообилни врнежи од дожд, проследени со повремено засилен ветер од северен правец. На околните планини врнежите ќе бидат од снег, што дополнително ќе ја засили зимската слика во регионот.
Температурите ќе бидат под просекот за овој период. Утринските ќе се движат од 0 до 9 степени, додека дневните ќе достигнуваат од 5 до 12 степени. Во Скопје, утринската температура ќе се спушти до околу 7 степени, а дневната ќе достигне околу или малку над 10 степени.
Метеоролозите предупредуваат на зголемена внимателност, особено за возачите кои ќе се движат низ планинските превои, каде што поради снегот условите за возење може значително да се влошат.
Следува период на нестабилно и студено време со елементи на вистинска зима. Циклонот носи комбинација од дожд, снег и силен ветер, со можност за обилни врнежи и сериозни временски услови.
