Музичкиот натпревар „Евровизија“, познат како најголем музички фестивал во Европа, ќе добие своја азиска верзија, а дебито е закажано за 14 ноември во Бангкок, главниот град на Тајланд. Организаторите се уште не ги откриваат деталите за правилата на натпреварот, но според традицијата на европскиот модел, очекувањата се дека земјите учеснички ќе ги избираат своите изведувачи кои ќе настапуваат со оригинални композиции ограничени на три минути.
Првичниот список на учесници брои десет азиски земји: Јужна Кореја, Бангладеш, Бутан, Камбоџа, Лаос, Малезија, Непал, Филипини, Виетнам и Тајланд како домаќин. Организаторите најавуваат дека во следните месеци други држави би можеле да се приклучат, отворајќи простор за еден вистински паназијски музички спектакл.
Мартин Грин, директорот на „Евровизија“, истакна дека лансирањето на азиското издание доаѓа во значајна година, одбележувајќи 70 години од постоењето на оригиналниот натпревар. „Азија е континент преполн со културни богатства, креативност и музички талент,“ рече тој, нагласувајќи дека новата сцена може да открие големи ѕвезди.
Идејата за азиска верзија постои уште од 2008 година, но сега конечно се реализира. Засега, регионалните гиганти Кина и Јапонија не се дел од натпреварот, а аналитичарите предупредуваат дека геополитичките тензии во регионот, како споровите меѓу Тајланд и Камбоџа или територијалните претензии во Јужното Кинеско Море – може да влијаат на динамиката на шоуто.
Во меѓувреме, Русија ја оживеа својата верзија на меѓународен музички натпревар, „Интервизија 2025“, која се одржа во Москва минатата година, а следното издание е закажано за септември 2026 во Ријад, Саудиска Арабија.
Организаторите проценуваат дека азиската „Евровизија“ може да привлече повеќе од 600 милиони гледачи, повеќе од трипати повеќе отколку последното европско издание, што ветува еден од најголемите телевизиски музички спектакли досега.
